Deprecated: mysql_connect(): The mysql extension is deprecated and will be removed in the future: use mysqli or PDO instead in /home2/hayernaysor/public_html/old1/conf.php on line 9
Շուշիի Ազատագրութեան 21-ամեակի Մեծաշուք Եւ Արժանավայել Տօնակատարութիւն
 
ՀՀ Սփյուռքի նախարարության նախագիծ
Այսօր` 17 / 10 / 2017
Որոնում`
 
Օրացույց
 
Սփյուռք
13.05.2013

Շուշիի Ազատագրութեան 21-ամեակի Մեծաշուք Եւ Արժանավայել Տօնակատարութիւն
Շուշիի ազատագրութեան 21-ամեակին առիթով, կազմակերպութեամբ Հայ կաթողիկէ Մեսրոպեան բարձրագոյն վարժարանի աշակերտական խորհուրդին, մայիս 10-ին, երեկոյեան ժամը 8:00-ին, վարժարանի բակին մէջ տեղի ունեցաւ տօնակատարութիւն`      ներկայութեամբ Լիբանանի մէջ Հայաստանի Հանրապետութեան ներկայացուցիչ Վարդան Ադամեանի, հոգեւոր հայրերու եւ քոյրերու, կրթական պատասխանատուներու, արցախեան պայքարի ազատամարտիկ Վիգէն Զաքարեանի ընտանիքի անդամներուն, ծնողներու եւ նախկին ու նոր մեսրոպեանականներու:
ՀԿՄ-ի շեփորախումբին կատարողութեամբ Լիբանանի եւ Հայաստանի քայլերգներու նուագէն ետք, Մեսրոպեան վարժարանի երգչախումբի աշակերտները երգեցին Արցախի քայլերգը:  Մեսրոպեան վարժարանի աշակերտական խորհուրդին անունով խօսք առաւ Մեղրի Չարըգեան, որ նշեց, թէ Շուշիի աշխարհագրական եւ ռազմական դիրքին կարեւորութիւնը Շուշիի ձեռքբերումը վերածեց յաղթանակներու յաղթանակին, Արցախի միջնաբերդի ամրապնդման:

Չարըգեան ըսաւ, որ Շուշիի ազատագրումէն 21 տարիներ ետք, այսօր գոյութիւն ունի Շուշին պահելու խնդիր, որուն իրականացման համար իւրաքանչիւր հայ, ո՛ւր որ ալ գտնուի, մեծ թէ փոքր, ունի իր պարտականութիւնը` զօրակցելու Արցախին, մասնակից դառնալու վերականգնման աշխատանքներուն եւ ի հարկին դառնալու սահմաններու պահակը:
Ապա Մարիլին Գասարճեան ասմունքեց «Արցախի լեռներ» բանաստեղծութիւնը, որմէ ետք Նարօտ Ադամեան ջութակով եւ Անի Գասպարեան դաշնամուրով նուագեցին երկու ստեղծագործութիւններ:

Շուշիի պանծալի յաղթանակին հերոսներու զոհաբերութիւնը արժեւորող տեսերիզի ցուցադրութենէն ետք, վարժարանի «Հաւասի» աշուղական համոյթը երգեց «Ղարաբաղ իմ»,  «Հայոց Երկիր» եւ «Յառաջ Հայաստան» երգերը: Խումբի գեղարուեստական պատասխանատուն է Գարմէն Աճեմեան:

Օրուան պատգամը փոխանցեց դոկտ. Լեւոն Աւետանեան, որ նշեց, թէ հայ ժողովուրդի հազարամեակներու պատմութեան ընթացքին, Շուշին մարմնաւորած է հայու ինքնուրոյնութիւնը եւ ազատ ու անկախ ապրելու ազգային բնազդը: Ան ըսաւ, որ Շուշիի ազատագրման ազդեցութիւնը ակնյայտ էր պատերազմական հետագայ գործողութիւններուն վրայ եւ քաղաքի ազատագրումին յաջորդեց Լաչինի միջանցքի բացման բարեյաջող գործողութիւնը, որ ճեղքեց Լեռնային Ղարաբաղի շրջափակման օղակը:

Դոկտ. Աւետանեան հաստատեց, որ այսօր ազգովին կը գտնուինք Շուշին վերականգնելու եւ վերաբնակեցնելու մարտահրաւէրին դիմաց, որ պարտաւորութիւն է եւ հրամայական: Իր խօսքի աւարտին, բանախօսը շեշտեց, որ Շուշիի ազատագրման կռիւներուն 57 նահատակները հետեւեցան գաղափարական պատուիրաններուն, եւ մենք` ապրողներս, պէտք է ապրինք ու գործենք նոյն պատուիրաններով:

Բանախօսութեան յաջորդեց վարժարանի նուագախումբին կատարումը. վերջինս նուագեց «Արդեօք ովքեր են» եւ «Ղարաբաղ»-ը: Նուագէն ետք Լիզա Հայրապետեան ասմունքեց «Ձօն» բանաստեղծութիւնը: Հանդիսութեան գեղարուեստական յայտագիրը  փակուեցաւ վարժարանի երգչախումբին կատարողութեամբ արցախեան երգաշարի ներկայացումով, խմբավարութեամբ` Մանուէլ Քէշիշեանի: Ապա «Շուշի» պարախումբը պարեց «Տրնթէզ»-ը,  որ ստեղծեց մեծ խանդավառութիւն: Պարախումբի պարուսոյցն է Սարին Արթինեան:

Աւարտին, խօսք առաւ Մեսրոպեան վարժարանի տնօրէն Կրեկուար Գալուստ, որ հաստատեց, որ Մեսրոպեան վարժարանը իր առաքելութեամբ կը հետեւի Վիգէն Զաքարեաններու ուղիին` տէր կանգնելով հայրենի հողին, արժէքներուն եւ ժառանգութեան: Կրեկուար Գալուստ յայտնեց, որ Մայիս ամիսը յաղթանակներու ամիս է, եւ Շուշիի յաղթանակը վերանորոգեց հայութեան պայքարելու կամքն ու ոգին:

Շուշիի ազատագրութեան 21-ամեակի հանդիսութիւնը փակուեցաւ գերապայծառ Մանուէլ եպս. Պաթաքեանի պահպանիչով եւ ՀԿՄ-ի շեփորախումբին կատարողութեամբ «Սարդարապատ» յաղթերգով:

«Ազդակ»

|

 
 
ԲՈԼՈՐ ՆՈՐՈՒԹՅՈՒՆՆԵՐԸ
© «Հայերն այսօր» էլեկտրոնային պարբերական
ՀՀ Սփյուռքի նախարարություն
Պատրաստված է ZOOM GRAPHICS -ում
© «Հայերն այսօր» էլեկտրոնային պարբերական
ՀՀ, ք. Երեւան,0002, Սարյան 22
Հեռ.` 53-09-38