Deprecated: mysql_connect(): The mysql extension is deprecated and will be removed in the future: use mysqli or PDO instead in /home2/hayernaysor/public_html/old1/conf.php on line 9
ՀՅԴ Լիբանանի Պատանեկան Միութիւնները Այցելեցին Մեծի Տանն Կիլիկիոյ Կաթողիկոսարան
 
ՀՀ Սփյուռքի նախարարության նախագիծ
Այսօր` 17 / 10 / 2017
Որոնում`
 
Օրացույց
 
Սփյուռք
13.05.2013

ՀՅԴ Լիբանանի Պատանեկան Միութիւնները Այցելեցին Մեծի Տանն Կիլիկիոյ Կաթողիկոսարան
Կազմակերպութեամբ ՀՅԴ Լիբանանի պատանեկան միութիւններու Ընդհանուր վարիչ մարմինի դաստիարակչական յանձնախումբին, մայիս 11-ին, Լիբանանի պատանեկան միութիւններէն աւելի քան 200 երէց պատանիներ այցելեցին Մեծի Տանն Կիլիկիոյ կաթողիկոսարան` Անթիլիաս:
Առաջին հանգրուանով, իբրեւ հայ եւ դաշնակցական, պատանիները իրենց յարգանքի տուրքը մատուցեցին Հայոց ցեղասպանութեան 1.5 միլիոն նահատակներուն` մոմավառութիւն կատարելով Հայոց ցեղասպանութեան նահատակներու Մատրան մէջ, ապա կառչած մնալու եւ խորապէս ամրացնելու համար իրենց քրիստոնէական հաւատքը, այցելեցին Անթիլիասի Ս. Գրիգոր Լուսաւորիչ Մայր տաճար:

Այնուհետեւ կարգապահ շարքերով պատանիները ուղղուեցան «Կիլիկիա» թանգարան. պատանիները առաջնորդեց ու մանրամասն բացատրութիւններ փոխանցեց «Կիլիկիա» թանգարանի պատասխանատու Պարոյր աբղյ. Շէրնէզեան: Ապա պատանիները ունեցան շահեկան դասախօսութիւն մը` «Հայ եկեղեցւոյ եւ եկեղեցականներու դերը ազատագրական շարժման մէջ» նիւթով: Սոյն դասախօսութիւնը ներկայացուց Վարանդ վրդ. Քորթմոսեանը:

Այցելութեան վերջին բաժինով, պատանիները առիթ ունեցան հանդիպելու Մեծի Տանն Կիլիկիոյ Արամ Ա. կաթողիկոսին հետ: ՀՅԴ Լիբանանի պատանեկան միութիւններու Ընդհանուր վարիչ մարմինի եւ պատանիներուն անունով Ընդհանուր վարիչ մարմինի ատենապետ Սագօ Արապօղլեան վեհափառ հօր յանձնեց «Դաշնակցական պատանիի գիրք»-ը իբրեւ յուշանուէր, նշեց Լիբանանի պատանեկան միութեան հիմնադրութեան 90-ամեակը եւ հակիրճ ձեւով ներկայացուց պատանեկան միութիւններու գործունէութիւնը:

Սիրալիր ընդունելութենէ ետք, վեհափառ հայրապետը առիթ ստեղծեց զրոյց մը կատարելու պատանիներուն հետ` Հայ դատի եւ հայ պատանիի դերակատարութեան մասին: Պատանիները խոստացան իրենց մայրենի լեզուին եւ քրիստոնէական կրօնին ամուր պահպանումով ըլլալ ջահակիրները ազգային պահանջատիրութեան, եւ ընդառաջելով վեհափառ հայրապետի խնդրանքին ու ոգեւորուելով տիրող յեղափոխաշունչ մթնոլորտէն, յաջորդաբար երգեցին «Պանք Օթոման» եւ «Մենք անկեղծ զինուոր ենք» երգերը:

Հանդիպումը վերջ գտաւ աջահամբոյրով եւ խմբային յիշատակի լուսանկարով մը:

«Ազդակ»

|

 
 
ԲՈԼՈՐ ՆՈՐՈՒԹՅՈՒՆՆԵՐԸ
© «Հայերն այսօր» էլեկտրոնային պարբերական
ՀՀ Սփյուռքի նախարարություն
Պատրաստված է ZOOM GRAPHICS -ում
© «Հայերն այսօր» էլեկտրոնային պարբերական
ՀՀ, ք. Երեւան,0002, Սարյան 22
Հեռ.` 53-09-38